Жаңалықтар

LLM модельдерін қазақ тіліне бейімдеуге қызығатындар үшін тамаша жаңалық!

Қауымдастығымыздың мүшелері Санжар Мұрзахметов @stringersolo, Бексұлтан Сағындық @bsagyndyk және Кирилл Якунин @JenarosHat қазақ тілін түсіну, логикалық пайымдау және басқа ерекшеліктерді тексеретін бенчмарктер топтамасын шығарды.

1) Команда бірнеше танымал датасетті қазақ тіліне аударды:

• Қазақ тіліндегі MMLU: көпміндетті тілді түсінуді тексереді
• Қазақ тіліндегі GSM8K: математикалық логиканы тексереді

2) Қазақстанға арналған multiple-choice бенчмарктер жасалды:

• Kazakh Constitution MC: құқықтық және азаматтық білімді тексереді
• Kazakh Dastur MC: мәдени мұра мен салт-дәстүрді түсінуді бағалайды
• Unified National Test MC: тарих, әдебиет, биология және басқа пәндерді қамтиды

Команда осы бенчмарктер бойынша ашық лидерборд және қазақ тіліне әзірленген модельдерді тексеріп, салыстыруға арналған платформа жасап жатыр.

Жоба туралы толығырақ команданың LinkedIn жазбасынан оқуға болады.

DSML KZ қауымдастығындағы әріптесіміз @zangir_iklassov-ты PhD диссертациясын сәтті қорғауымен құттықтаймыз! 🎉 🎉

Зәңгір нейрондық желілер мен reinforcement learning маршруттау, ресурстарды басқару және жоспарлау секілді комбинаторлық есептердің шешімін табуды қалай жеделдете алатынын зерттеп, мына жобаларды ұсынды:

• Өндірісті жоспарлауға арналған жаңа оқыту тәсілі: есептердің күрделілігі динамикалық түрде артып, модельдердің оқуын жақсартады
• Графтағы қозғалыс уақыты стохастикалық болатын маршруттау есептерін шешуге арналған RL framework
• Комбинаторлық есептерді тиімді шешу үшін үлкен тілдік модельдерді қолданатын өздігінен бағытталатын іздеудің жаңа стратегиясы

Бұл жұмыстар IJCAI23, ACML23, IEEE Access және NeurIPS24 басылымдары мен конференцияларында жарияланды.

MBZUAI — 2019 жылы Абу-Дабиде ашылған, жасанды интеллектке арналған әлемдегі алғашқы университет және AI/ML бағыты бойынша үздік 20 оқу орнының бірі. Зәңгір MBZUAI тарихында PhD диссертациясын сәтті қорғаған үшінші докторант атанды!

Жақында MBZUAI-дың 2025 жылдың күзіне арналған магистратура және PhD бағдарламаларына құжат қабылдау басталды. Университетте бес бағыт бар: ML, CV, NLP, CS және Robotics. Өтінімдердің бірінші легін тапсыру мерзімі — 2025 жылғы 15 қаңтар.

Kolesa Group зерттеуі 3.0

Kolesa Group Қазақстандағы data мамандықтар нарығына арналған үшінші зерттеуін өткізді.

2021 жылдан бері мамандықтың жетілгені байқалады. Алдыңғы зерттеу нәтижелерімен салыстырғанда, 26–30 жастағы мамандар үлесі 15%-ға, Алматы мен Астанадағы мамандар үлесі 6%-ға өсті. Үш жылда аналитиктердің жалпы жұмыс өтілі де артты: 3–5 жыл тәжірибесі бар мамандар үлесі 38%-дан 49%-ға дейін өскен.

Жалақы:

• Data Science — 825 000 теңге, медианасы — 1 099 576 теңге
• Data Analysis — 650 000 теңге, медианасы — 857 485 теңге
• BI — 650 000 теңге, медианасы — 726 639 теңге
• DWH — 824 000 теңге, медианасы — 1 081 145 теңге
• ML — 1 350 000 теңге, медианасы — 1 600 769 теңге
• Басқа бағыттар — 925 000 теңге, медианасы — 929 180 теңге

Соңғы үш жылда орташа жалақы шамамен 40%-ға өсті. Финтех компанияларында жұмыс істейтін аналитиктер саны 17%-ға артқан. Респонденттер қашықтан жұмысты (42%) компанияның корпоративтік мәдениетінен (35%) жоғары бағалайды.

Бұрынғыдай, қауымдастығымызға зерттеудің бастапқы деректері берілді.

Beeline Қазақстан және QazCode ұйымдастыратын NLP мамандарына арналған митап | 24.10.2024, 17:00 | Алматы

24 қазанда DAR U алаңында тілдік модельдерді талқылаймыз. QazCode (Beeline) Data Scientist маманы Бексұлтан Сағындық NLP саласындағы жаңа трендтермен бөлісіп, қазақ тілінің LLM дәуіріне қалай кірігіп жатқанын айтады. Бексұлтан — Beeline Қазақстан және QazCode-та қазақ тіліндегі AI әзірлеп жүрген мамандардың бірі.

Одан кейін QazCode, Big Data Team және Conformal Group сарапшыларымен еркін форматтағы кездесу өтіп, NLP-ді бизнесте және LLM-дерді нақты кейстерде қолдану талқыланады.

Күні: 24.10, 17:00. Өтетін орны: DAR U, Көктем-2, 22, 4-қабат.

Іс-шара тегін, бірақ орын саны шектеулі. Тіркелу сілтемесі